- Comidas e ceas con non conviventes non deberían realizarse este ano
- Debemos frear os posibles repuntes en xaneiro e en febreiro antes do inicio e posta en marcha da vacinación
- Actividades ao aire libre, culturais e compras poderían realizarse coas necesarias medidas de protección
- Os test diagnósticos COVID-19 xeran unha falsa confianza
- Debemos manter a máxima actividade económica posible, pero sen correr riscos innecesarios
Como entidade representativa dos médicos e, ao tempo, corporación de dereito público cuxa obrigación é velar pola saúde colectiva, debemos compartir coa cidadanía ourensá nosas recomendacións baseadas no coñecemento do que dispoñemos.
E cremos que este ano non debemos celebrar o Nadal do modo ao que estamos afeitos.
As comidas e ceas –eixo central das festas do Nadal- de familias, amigos e compañeiros de traballo que non sexan conviventes habituais, son unha das actividades de maior risco para a infección por COVID19. Por tanto, non deberiamos realizalas este ano nin planificar a súa celebración.
Por moito que melloren as cifras de contagios e hospitalizados nos días/semanas anteriores, o virus seguirá entre nós e debemos evitar un novo repunte de casos en xaneiro- Febreiro coa súa correspondente mortalidade, antes da chegada e administración das esperadas vacinas.
Outras actividades -sobre todo as que se realizan ao aire libre- como as culturais, as compras, os agasallos, a consumición en terrazas… non deberían ter problema en realizarse coas necesarias medidas de protección, se a situación epidemiolóxica mellora como é desexable e esperable.
Queremos alertar, así mesmo, sobre a falsa confianza que poidan xerar os test diagnósticos para a COVID19. De todos son coñecidas as súas limitacións na interpretación clínica, pero sobre todo son só unha “foto fixa” que cambia en poucos días. Nin sequera a súa realización reiterada e secuencial ofrece seguridade. Só hai que observar o alto número de deportistas profesionais que se contaxian a pesar diso. A idea de “son negativo, podo ir a esta ou outra cea”, é un erro claro.
Debemos todos transitar con intelixencia e sentido común, durante a parte -esperemos que final- deste pesadelo. Mantendo a máxima actividade económica posible, pero sen correr riscos innecesarios.
Por todo iso, merece a pena modificar este ano o noso modelo habitual de Nadal sen poñer en perigo a propia saúde, a dos seres máis queridos e a dos nosos concidadáns.
Un contaxio non é só unha mala noticia para o que o sofre, o é tamén para a súa contorna familiar e social e para toda a comunidade.
Xunta Directiva do Colexio Médico de Ourense
Ourense, 24 de novembro de 2020
Noticias relacionadas:
